Градскиот трговски центар како сообраќајница. Се вози со тротинети, мопеди, моторцикли но и велосипеди. Граѓаните револтирани, апелираат дека не се чувствуваат безбедни и бараат некој да го регулира движењето на превозните средства низ трговските центри. Во Министерството за внатрешни работи ни рекоа дека немаат надлежност за регулирање на сообраќајот, зошто трговските центри не се сообраќајници. Обезбедувањето на трговскиот пак објаснува дека тие се обезбедување за сопствени потреби и немаат ингеренции во делот на воспоставување на јавниот ред и мир.
Во меѓувреме граѓаните оставени сами на себе. Од МВР велат дека движењето низ ГТЦ не е во нивна надлежност.

-Единицата за безбедност на патниот сообраќај постапува согласно Закон за безбедност на сообраќајот на патиштата со кој Закон се уредува безбедноста и заштитата на патиштата. Имено, согласно член 103-а став 7 од истоимениот Закон, „Возач на електричен тротинет, не смее да се движи по тротоар, пешачка патека односно друга површина наменета за движење на пешаци,со брзина поголема од 6 км/час”- велат од МВР.

Според нив трговските центри се јавни површини, но не секоја јавна површина е сообраќајна површина, односно посетителите во трговските центри не се учесници во сообраќајот и не се категоризираат како пешаци, за што Единицата за безбедност на патниот сообраќај нема надлежност во Трговските центри.

Од Градскиот трговски центар велат дека нивното обезбедување е за сопствени потреби и немаат ингеренции за да интервенираат во делот на јавен ред и мир.

И додека никој не е надлежен низ трговските центри се вози како по улица. „Слободен печат“ ги праша граѓаните дали се чувствуваат безбедни додека купуваат низ Градскиот трговски центар, но и низ останатите трговски центри низ градот? Граѓаните револтирани од возењето низ затворен простор, велат дека често избегнуваат инциденти.

-Не, не се чувствувам безбедно, не би требало да се вози низ ГТЦ. Се случува, повремено да сум во опасност, јас невнимателен и тие брзаат и лесно може и да повредат некого- вели еден скопјанец.

Друг објаснува дека законот мора да се практикува, а дали треба полиција да има и да ги спречува не е сигурен.

– Некој мора да ги спречи, трговскиот центар мора да поведе сметка за да не дојде состојбата до полиција. Прво треба обезбедувањето да ги предупреди, па ако имаат проблем, некој е насилен ќе викнат полицаец, инаку секаде има тротинети и тоа е многу опасно и сите се согласуваме со тоа. А не знам зошто не се превземаат мерки, симболични казни веројатно има затоа никој не почитува закон- вели граѓанин од Скопје.

Сите се согласни дека покрај обезбедувањето во трговските центри треба да има сообраќајна полиција да шета и да ги санкционира престапниците. Велат дека кога ќе почнат да казнуваат ќе се намали возењето на тротинети и моторцикли низ трговските центри.

ВИДЕО АНКЕТА| Внимавајте тротинет! Трговските центри како сообраќајници, се вози насекаде