Иако станува збор само за првото коло од новото издание во Лигата на Нации, поразот на Косово од 3:0 во натпреварот против Романија донесе проблеми за оваа селекција.

Имено, селекторот Франко Фода одлучил да отстрани тројца стандардни првотимици од репрезентацијата на Косово. Во прашање се Аријанет Муриќ, Едон Женгрова и Флорент Муслија.

Сите тројца повеќе нема да се дел од репрезентацијата додека е Фода селектор поради прекршување на одредени правила.

„Во заедничка одлука со селекторот фудбалерите Муриќ, Женгрова и Муслија се отстранети од репрезентативниот собир поради прекршување дисциплински правила“, стои во соопштението.

Од федерацијата не откриваат детали како точно тројцата фудбалери ги прекршиле правилата. Дополнително е повикан голманот Фатон Малоку на местото на Муриќ.