Изутрина во Конче снема електрична енергија и ги крена земјоделците на нозе дека во ек на нивните земјоделски активности ќе имаат чести прекини на струја. Тие во изминатиов период се соочуваа со прекини на електрична енергија, а таквата состојба ја поврзуваа со инсталираните фотоволтаици за електрична енергија. Градоначалникот на Општина Конче, Златко Ристов, ја демантира поврзаноста на фотоволтаиците со прекините и вели дека се прави реконструкција на електричната мрежа, но дека на барање на своите соселани, во август се прекинати активностите на терен.

– Ние имаме мал капацитет на инсталирани фотоволтаици и тие немаат врска со прекините на електрична енергија што се случуваа. Јас се обидов повеќепати тоа и да го објаснам, но упорно се шират гласините за такво нешто. Ние имаме проблеми со електричната мрежа и се врши реконструкција на главниот вод, затоа што мрежата е стара 56 години. За да се изведе реконструкцијата, во јули двапати неделно – во вторник и во четврток снемуваше струја. Но, бидејќи земјоделците во август имаат многу работа, се договоривме со ЕВН да паузираат активностите и да продолжат во септември. ЕВН ни излезе во пресрет, иако и тие си имаат свој план по кој ги прават реконструкциите – изјави за „Слободен печат“ градоначалникот Ристов.

Жителите од Конче се револтирани од напојувањето со електрична енергија. Освен што поинтензивните прекини на електрична енергија ги поврзаа со фотоволтаиците, се побунија и дека со нив им е узурпирано плодно земјиште, како и дека не требало да се градат до туристичкиот комплекс „Конечки езера“.

– Откако се ставија фотоволтаиците кај езерата за производство на струја, а остана истата мрежа, изгледа се преоптоварува и снемува електрична енергија. Сè е погрешно, нема нов мрежен капацитет, а има повеќе струја. Потоа, недозволиво е да има фотоволтаици на плодно земјиште. Во туристичкиот комплекс „Конечки езера“ беше вложено за развој на туризам, а сега кога ќе дојде некој турист, ќе гледа во фотоволтаици. Тие што издаваат дозволи за изградба на фотоволтаици треба да бидат внимателни и треба да сносат одговорност. А, градоначалникот исто треба да внимава што се прави во општината и да ни овозможи развој – велат жители од Конче.

Експертите укажуваат дека до прекин на електрична енергија не може да дојде поради поголемо производство на струјата од фотоволтаиците, но дека може да има варијации во напонот, доколку не се успее во балансирањето