Просечната месечна нето-плата по вработен во правен субјект за февруари изнесува 1.416 евра, објави во вторникот Централниот завод за статистика на Хрватска. Споредено со февруари лани, номинално е повисоко за 13,5 отсто, а реално за 9,5 отсто (кога ќе се земе предвид годишната инфлација од четири отсто), велат државните статистичари.

Во февруари во правните субјекти во Хрватска биле вработени 1,47 милиони работници, а вкупниот број на вработени во сите сектори е 1,69 милиони луѓе. Речиси 150.000 вработени во правни лица во февруари годинава заработиле помалку од 801 евро нето месечно.

Бидејќи загарантираната минимална плата за оваа година е околу 750 евра нето, грубо може да се каже дека ја добива секој десетти работник во Република Хрватска.

Кога овој опсег ќе се земе малку пошироко, излегува дека дури 300.000 вработени во февруари земале плата помала од 875 евра, покажуваат податоците на Централниот завод за статистика, објави Даница.хр.