„И јас како градоначалник ако сакам да градам на самиот автопат некој споменик не ќе можам“, ова е дел од одговорот за телевизија Сител на градоначалникот на Општина Желино Блерим Сејдиу откако Министерката за одбрана Славјанка Петровска во вторникот на одбележувањето на 22- годишнината од загинувањето на 10- македонски бранители кај месноста Карпалак истакна дека ќе бара дозвола од Општина Желино за изградба на достојно спомен обележје кај месноста Карпалак.

„И јас како градоначалник ако сакам да градам на самиот автопат некој споменик не ќе можам. Морам да се обратам до ЈП за државни патишта. Значи, Законот го вели тоа. Плус тоа, таму нема урбанистички проект. Законот вели така. Треба да се урбанизира прво, да се види дали има услови, итн., итн. Но во самиот автопат, каде што е предвидено за тоа директно е надлежен ЈП за државни патишта“, вели градоначалникот Блерим Сејдиу.

Денеска на денот кога се одбележуваат 22 години од загинувањето на осуммината припадници на резервниот состав на АРМ кај месноста Љуботенски Бачила градоначалникот на Бутел Дарко Костовски, најави дека општинскиот совет е подготвен да донесе одлука да се отстапи простор за спомен обележје на загинатите кај Љуботенски Бачила.

„Општина Бутел и јас како градоначалник сме спремни веднаш да изнајдеме локација и простор, согласно закон и целосна документација за спомен обележје, за овие осум загинати бранители. Се надевам дека одговорот ќе биде позитивен и за многу кратко време општина Бутел во соработка со државата, практично со Министерството за одбрана ќе изнајде едно конечно едно решение за достојно да продолжиме да го чествуваме овој ден“, изјави Дарко Костовски градоначалник на Бутел.

Инаку бранителите на одбележување на масакрот кај Карпалак беа револтирани што и по повеќе од две децении од масакрот, надлежните сѐ уште не преземаат мерки да им се оддаде почит на загинатитe на достојно спомен обележје. Јордан Трајковски, претседател на Здружението на резервни воени обврзници учесници во воениот конфликт 2001, во вторникот рече дека како и пред повеќе од две децении се поклонуваат во почит на хероите на нешто што го нема, на една обична плоча која не доликува на настанот кој се случил.

Министерката Петровска изјави дека загинатите бранители заслужуваат споменик кај месноста Карпалак.

„Јас, како Министерка за одбрана лично сметам дека заслужуваа достоен споменик со кој што нема да ги вратиме назад, но ќе имаме место каде достојно ќе им оддаваме почит на загинатите.Денеска во текот на денот до Општина Желино која е надлежна општина ќе испратам писмо, исто како што направив и за загинатите кај Вејце, со барање на ова место да се изгради достоен споменик, а се разбира Министерството за одбрана е подготвено тоа да го реализира“, рече во вторникот Петровска.

ВИДЕО: Масакрот кај Карпалак одбележан пред мала спомен плоча, министерката Петровска ќе бара од Желино дозвола за споменик