Ракометатите на Вардар со 31:26 го совладаа германскиот Флензбург во чертвртото коло од Лигата на шампионите и ја запишаа првата победа сезонава.

Вардарци во дуелот со досега непоразениот германски тим, покажаа дека принудната пауза од две недели поради одложените натпревари со Елверум и Пик Сегед залудно внесе доза на неизвесност кај тренерот Стевче Алушовски и самите ракометари.

Ракометарите против Флензбург демонстрираа зашто се уште се актуелни европски шампиони, одлична игра во одбраната, одличен голмански тандем во Борко Ристовски и Марко Кизиќ , како и сигурна игра во нападот и најавија ветувачка сезона во елитното натпреварување.
По почетното водство од 0:2 на германскиот тим, Вардар експресно возврати со два гола на Тимур Дибиров, а со голот на Марко Вујин „црвено-црните“ го забележија првото водство.

Одличната игра на Вардар во 10 минута му донесе и водство од три гола (8:5) благодарение на ударот од седум метри на Чупиќ. Германците возвраќаат и во 16. минута го израмнија резултатот (10:10).

Во финишот на првиот дел, вардарци ја враќаат предноста од три гола (14:11) благодарение на головите на Талевски и Јотиќ, додека на голот се разбрани Кизиќ кој нанижа неколку одбрани.

Првото полувреме заврши со два гола предност за Вардар и тоа откако Флензбург постигна два гола во последната минута за 17:15.

Второто полувреме започна на идентичен начин како и првото, со два гола на Флензбург и тоа на Менсах Јарсен и Јоханесен.
Но, „црвено-црните“ експресно ја враќаат предноста од три гола и рутински до крајот ја одржуваа и ја зголемија предноста за прва победа во Лигата на шампионите оваа сезона.

Одлична партија прикажа капитенот Стојанче Стоилов кој постигна осум гола, додека Дисингер и Јотиќ постигнаа по четири, Дибиров и Чупиќ по три.

Нареден противник на Вардар е португалскиот Порто, а натпреварот повторно ќе се игра во СЦ Јане Сандански.