Светскиот економски форум (СЕФ) потврди дека ги разгледува тврдењата за финансиски и етички прекршоци во кои наводно се вмешани неговиот основач и долгогодишен претседател, Клаус Шваб и неговата сопруга Хилда, пренесе „Политико“.

Оваа одлука доаѓа по објавувањето на извештајот во „Вол стрит џурнал“, во кој детално се опишани обвинувањата за можен судир на интереси и несоодветно управување против Шваб, кој пред два дена се повлече од челната позиција во Одборот на доверители на СЕФ.

Денес, СЕФ објави дека добил информативно писмо со наведените тврдења и дека започнал внатрешна проверка, во соработка со надворешен правен советник. „Иако Форумот ги сфаќа овие тврдења сериозно, нагласува дека тие остануваат недокажани и ќе го чека исходот од истрагата за дополнително коментирање“, се вели во соопштението.

Во изјава за „Вол стрит џурнал“, портпаролот на Клаус и Хилде Шваб ги негираше обвинувањата.

СЕФ, познат по својот годишен самит од висок профил во Давос, Швајцарија, собира глобални политички и деловни лидери, академици и претставници на граѓанското општество за да разговараат за важни меѓународни прашања.

Овој собир во луксузниот швајцарски скијачки центар стана една од најзначајните платформи за глобален дијалог од основањето на СЕФ од страна на Шваб во 1971 година.

Шваб, економист роден во Германија, минатата година се повлече од позицијата извршен директор. Во понеделникот беше објавено дека тој исто така ќе ја напушти функцијата претседател на Одборот на доверители на форумот.