Во просториите на „Јуроп хаус Скопје“ на 30 април, со почеток од 20 часот, ќе се одржи седмото издание на мултимедијалниот настан „Клинци“. Во рамки на настанот публиката ќе има можност да проследи книжевно читање на кое ќе се претстават четворица млади автори и авторки, како и изложба од млада уметница.

На книжевното читање со своја поезија и проза ќе се претстават Андреј Анѓеловиќ, Павлина Атанасова, Милена Неделковска и Нино Наумовски. Изложбата која ќе биде поставена е на Евгенија Трајковска.

Модератор на „Клинци“ е младиот поет Андреј Медиќ Лазаревски, а настанот е во организација на Здружението за афирмација на младинската култура „Култура Бета“ – Скопје и „Јуроп хаус Скопје“.

Мултимедијалниот настан „Клинци“ е наменет за претставување на младинското културно творештво. До сега на „Клинци“ се имаат претставено над дваесетина млади книжевници и десетина ликовни уметници.