Министерката за финансии Гордана Димитриеска-Кочоска на денешната прес-конференција на која информираше за сработеното во текот на измината година, рече дека до овој момент нема пристигнато понуда за изградба на брзата пруга од Коридорот 10, бидејќи целиот проект бил комплексен и на банките им требало време да ги анализираат сите работи.

Таа додаде дека рокот за достава на понудите е 7 јули кога ќе се знаат повеќе детали.

„Интересот е многу голем. Ние пуштивме барање за понуда до 22 институции, а дополнително ни се јавија уште две кои побараа да пуштиме понуди до нив. Нормално дека во интерес на државата треба да обезбедиме понуди и што е можно пониска цена за железничката пруга така што пуштивме дополнително барање и до тие две институции. Има многу прашања и заради тоа го продолживме рокот до 7 јули. Станува збор за комплексен проект и мора да ги разбереме и банките дека имаат потреба од појаснувања“, изјави Димитриеска-Кочоска и нагласи дека се во постојана комуникација.

Министервото за финансии има испратено барање за понуди до 24 банки за изградба на брзата пруга долж Коридорот 10.