Во сите градови и места низ земјава со положување на Чесниот крст и осветување на водите денеска ќе се одбележи Богојавление – Водици.

Со чинот на осветувањето на водите на Охридското Езеро ќе началствува Архиепископот Охридски и Македонски г.г. Стефан, кој и ќе го положи Чесниот крст во езерските води, така што оваа година се очкува и рекорден број верници и капачи во Охрид.

Во Скопје, над 220 граѓани денеска ќе се обидат да го фатат крстот што ќе биде положен во реката Вардар, по повод празникот Богојавление-Водици. Осветувањето на водите на реката Вардар и чинот на положување на Чесниот крст и оваа година традиционално го организира Скопската православна епархија при МПЦ-ОА.

Литургијата ќе почне во 9 часот во храмот „Рождество на Пресвета Богородица“, каде што ќе чиноначалствува владиката Јосиф. По завршување на литургијата, во 11.30 часот владиката Јосиф, заедно со свештенството во поворка ќе се упатат кон мостот „Слобода“ каде ќе почне „Водосветот“, а потоа ќе се положи крстот во реката Вардар.

Богојавление – Водици го празнуваат православните верници уште од вториот век. На овој ден, според христијанското предание, Свети Јован Крстител го крстил Исус Христос во реката Јордан. Празникот се нарекува уште и Водици поради големиот водосвет што го извршува црквата на овој ден.

Според верувањата, оној што ќе го фати крстот ќе го следи среќа и благослов цела година. Фаќањето на крстот значи соединување на човекот со Христа, а се верува дека со положувањето на крстот, водите стануваат лековити.