Во матичниот објект на градинката „13 Ноември“ во општина Центар во тек е реновирање на просторот на јаслите и долниот кат. Во моментов, се врши молерисување на ѕидовите, а веќе е завршено стругањето и лакирањето на паркетот во занималните и ходниците.

Молерисувањето ги опфаќа и скалите, влезот, канцелариите, тријажниот простор и чајната кујна. По завршување на оваа фаза, ќе продолжи стругањето и лакирањето и на „стариот дел“ од објектот, каде молерисувањето беше изведено во претходната година. Условите во градинките мора да бидат одраз на грижата што ја имаме кон најмладите. Затоа, вложуваме континуирано во безбедна, функционална и топла средина каде што децата растат среќни, а вработените имаат подобри услови за работа, вели градоначалникот Горан Герасимовски.

Дополнително, како што информираат од Центар реализирана е набавка на нов мебел за занималните во матичниот објект, како и набавка на три нови клима-уреди кои ќе бидат монтирани во просториите каде што е најнеопходно. Набавени се и наставно-образовни и дидактички материјали според Монтесори програмата, како и играчки за децата од групата јасли.