Аптекарот од Клиниката за онкологија, Калтрин Уштеленца, обвинет за примање поткуп од сега починатата пациентка Минка Веизовска, денеска не се појави во судница. Рочиштето беше одложено откако неговата адвокатка достави документи до судот дека нејзиниот клиент не е во состојба да присуствува.

Пациентката Минка Веизовска почина пред три недели, но и покрај тоа процесот продолжува, бидејќи е отпочнат по службена должност во соработка на МВР и Обвинителството, а не по приватна тужба. Во судницата денеска беше присутен беше сопругот на Веизовска, како и нејзин братучед. Сите сведоци што беа викнати денеска – докторката на пациентката Симонида Црвенкова, сестрата од дневната болница Славица Спасовска и раководителката на клиничката аптека Билјана Настова, се појавија во судница, но си заминаа без да дадат искази, зашто обвинетиот не дојде. Викнати се како сведоци за следното рочиште.

Аптекарот од Клиниката за онкологија, Калтрин Уштеленца според обвинението, примил награда за на пациентката Минка Веизовска која боледуваше од карцином на белите дробови, да ѝ издаде скапа биолошка терапија „кејтруда“, која што би морал да ѝ ја издаде бесплатно, со оглед на тоа што таа била осигуреник на Фондот за здравство и имала медицински извештај за терапијата од докторката Симонида Црвенкова. Веизовска еден месец пред да почине, истакна дека за неа проблемот не бил во парите што ги давала, туку во тоа што се посомневала дека терапија воопшто не добива, туку плаќа мито за физиолошки раствор.

Во текот на досегашниот тек на судскиот процес, сведоци беа повеќе лица. Меѓу нив, главниот инспектор од одделот за организиран криминал, единица за корупција при МВР, Љупче Тодоровски во судница го опиша моментот кога на лице место тој и уште неколкумина инспектори го виделе примањето на поткупот.

– Ги зеде стоте евра од пациентката, ги стави во дуксерот и продолжи да јаде од бурекот. Со уште шестмина полициски службеници бевме присутни на местото на извршувањето на кривичното дело и имавме прилика лично да воочиме дали му е ставена банкнотата или тој ја прима во својата рака и ја става во дуксерот. Потврдувам дека банкнотата му беше дадена во десната рака и ја стави во дуксерот, па продолжи да јаде од бурекот. Тогаш е лишен од слобода од наша страна, изјави инспекторот од МВР Тодоровски.

Потресен исказ за Онкологија во судница: Не ми беше за парите што му ги давав на аптекарот, туку затоа што не ми се даваше терапија!