Најдобриот ММА борец во историјата, легендарниот Џон Џонс, официјално стави крај на својата голема кариера. Претседателот на УФЦ, Дејна Вајт, ја соопшти големата вест на прес-конференцијата во Баку:

„Џон Џонс синоќа нè повика и ни кажа дека се пензионира. Тоа значи дека Том Аспинал сега е официјален шампион во тешка категорија.“

Навивачите со нетрпение ја очекуваа потенцијалната борба меѓу Џонс и Аспинал, но сега е јасно дека такво нешто нема да се случи.

„Официјално се пензионирам. Долго размислував за оваа одлука. Уште од првиот ден во октагонот мојата цел беше да ги поместам границите на можното во овој спорт. Ви благодарам на сите, особено на моите противници, кои ме натераа да го дадам најдоброто од себе“, објави Џонс на социјалните мрежи.

🚨 TOM ASPINALL IS THE OFFICIAL HEAVYWEIGHT CHAMP@DanaWhite has announced that Jon Jones has RETIRED, thus elevating @AspinallMMA to become the heavyweight champ 🏆 pic.twitter.com/oJ8a9nl8KT

— UFC (@ufc) June 21, 2025

Џонс заминува како најголем по многу параметри. Во кариерата имаше 30 професионални борби, а победи во 28, еднаш беше дисквалифициран (против Мет Хамил) и една борба остана без исход поради пад на допинг-тест по реваншот со Даниел Кормие, кого го нокаутираше.

Неговите најголеми успеси доаѓаат од полутешката категорија. Во 2011 година, на само 23 години, стана најмладиот шампион во историјата на УФЦ победувајќи го Маурисио „Шогун“ Руа, рекорд што сè уште не е соборен.

По 11 успешни одбрани на титулата во полутешка категорија, Џонс се пресели во тешка категорија, каде што исто така стана шампион и еднаш ја одбрани титулата. Вкупно, има најмногу одбрани на шампионски појас во историјата на УФЦ (12), најмногу борби за титула (17) и најмногу победи во тие борби  (16).

Победи осум поранешни шампиони и еден привремен шампион, а уште во 2021 година беше примeн во УФЦ „Куќата на славните“. Џонс не само што ги редефинираше стандардите во ММА, туку го остави својот белег како најкомплетниот борец кој некогаш се појавил во октагонот.