Палестинската милитантна група Хамас се очекува денеска да ослободи вкупно осум заложници, тројца Израелци и пет Тајланѓани, соопшти Израел.

Ќе бидат ослободени израелските заложници,  две жени, меѓу кои Арбел Јехуд и воената набљудувачка Агам Бергер, како и 80-годишниот маж Гади Мозес, објави Би-би-си.

Ова ќе биде трето ослободување на заложниците според договорот за прекин на огнот во Газа, а во замена за израелските заложници од израелските затвори ќе бидат ослободени 110 Палестинци.

Се уште не се соопштени имињата на тајландските заложници кои ќе бидат ослободени, пренесува Танјуг.

Нивното ослободување би било унилатерален потег на Хамас и нема да биде дел од договорот.

Наводно, станува збор за земјоделски работници кои биле киднапирани од Израел каде што работеле.

Тајландската влада објави дека шест тајландски државјани се уште се држат како заложници на Хамас во Газа и дека претпоставува дека другите двајца заложници се мртви.

Имињата на 110-те палестински затвореници кои Израел треба да ги ослободи денеска не се објавени, но се верува дека меѓу нив има најмалку 30 жени и деца, како и затвореници кои отслужуваат доживотна казна.

Прекинот на огнот во Појасот Газа стапи на сила на 19 јануари.

Седум жени заложници веќе се ослободени во замена за повеќе од 290 палестински затвореници кои се држат во израелските затвори.

Четвртото ослободување на заложниците, тројца мажи, се очекува да се случи во сабота, соопшти израелската влада.