Во основното училиште „Димитар Миладинов“  во тек е реконструкција на фискултурната сала, со што, како што велат од Општина центар, продолжува заложбата за создавање квалитетни услови за воспитно-образовниот процес и за унапредување на спортската инфраструктура во училиштата.

Реконструкцијата предвидува санација на подот, реконструкција на ѕидовите и внатрешната кровна површина, замена на дотраените прозорци и бележење на спортскиот терен.

Градоначалникот Горан Герасимовски нагласува дека инвестициите во образованието и спортот остануваат меѓу клучните приоритети на Општината и дека во изминатиот период значително се подобрени условите во сите основни општински училишта во Центар .

Посветено работиме на создавање современи, достапни и безбедни училишни простори, како за наставата, така и за спорт и рекреација. Еден од нашите стратешки приоритети е поддршката на спортот и поттикнување здрави животни навики кај младите. Со реконструкцијата на оваа фискултурна сала, учениците ќе добијат простор што инспирира, мотивира и ги охрабрува да бидат физички активни, што е особено важно за нивниот психофизички развој, вели Герасимовски.