Во тек е изградбата на нов урбан парк во Марино, информираат од Општина Илинден, кој ќе се простира на повеќе од 5.000 метри квадратни.

Паркот ќе биде сместен помеѓу улиците „531“, „532“ и „534“, на површина од приближно 5.600 метри квадратни. Проектот предвидува комплетно партерно уредување, инсталација на улично осветлување, поставување чешми, клупи, корпи за отпадоци, паркинг-простор, пешачки патеки и сервисна улица. Просторот ќе содржи зелени површини, отворен плоштад за јавни настани, фонтана во централниот дел, жардиниери со декоративни растенија и детско игралиште опремено со реквизити за најмладите, велат од Илинден.

Според градоначалникот Александар Георгиевски, уредувањето на јавниот простор и неговата урбанизација се клучни за обезбедување квалитетна средина за одмор и рекреација на жителите.

Со овој проект, како што истакнуваат од Општина Илинден, продолжува модернизацијата и уредувањето на јавните простори низ целата територија на општината.