Во Делчево со предавање на теми за унапредување на безбедноста на пешаците со посебен акцент на децата, започна реализацијата на годинешната Кампања „Се движиме безбедно“ на подрачјето на градот.

Активностите се во организација на Општината и Општинскиот совет за безбедност на сообраќајот на патиштата Делчево, а во соработка со воспитно-образовните установи, Дневниот центар за лица со посебни потреби, Полициската станица од општа надлежност, Регионалниот центар за гранични работи – Исток и други заинтересирани лица.

Кампањата „Се движиме безбедно“ како што беше кажано на првата активност одржана во делчевското училиште „Ванчо Прке“, има за цел да ја унапреди безбедноста на пешаците со акцент на децата како пешаци во сообраќајот.

– Во рамки на првата одржана активност лицата кои спаѓаат во категоријата пешаци беа запознаени со правилата и прописите за одговорно учество во сообраќајот важни за нивната возраст. Тука спаѓаат поминување на пешачки премин, поминување на улица каде нема обележан пешачки премин, со реализирано и нагледно предавање на улица, каде беа разработувани практични примери, истакнаа од Општинскиот Совет за безбедност во сообраќајот на патиштата.

Безбедноста на децата во сообраќајот е дефинирана како највисок приоритет на локално и национално ниво, имајќи го предвид фактот дека тие припаѓаат во групата ранливи учесници во сообраќајот.

-Поради тоа потребно е да бидат унапредени условите за нивно безбедно движење по улиците и патиштата, но и да се зголемат нивните знаења за сообраќајната инфраструктура, сообраќајната сигнализација и правилата и прописите преку кои би се самозаштитиле како учесници во сообраќајот, додаде Николина Мавродиева Петровска од ОСБСП, Делчево.

Речиси половина од вкупниот број лица здобиени со лесна телесна повреда се деца и млади од 15 до 24 години, односно 47,3% што е доволен показател за преземање мерки и активности преку кои би се унапредила нивната безбедност во сообраќајот. Овој податок е резултат на анализата на податоците за сообраќајни незгоди на подрачјето на Општина Делчево кои се случиле во периодот 2020-2021 година работена за потребите на Стратегијата за безбедност на патиштата и Акцискиот план за оваа општина 2023-2027.

– Поради тоа се апелира до возачите на делот од патот или улицата каде се движат деца или се поставени сообраќајни знаци за учество на деца во сообраќајот, да возат со особена претпазливост и приспособена брзина за запирање на возилата во случај на потреба, додаде Мавродиева Петровска.

Кампањата опфаќа повеќе активности кои имаат за цел преку едукација и контрола да се влијае на подигнување на јавната свест за одговорно учество во сообраќајот.