Јавното обвинителство ги истражува причините за настанувањето на пожарот на отпадот во Визбегово, евентуалните опасности што ги предизвика огнот врз здравјето на луѓето и бара притвор и куќен притвор за осомничените сопственици на отпадот кои нападнаа новинарска екипа.

-Постапувајќи во врска со вчерашниот пожар во Визбегово, Основното јавно обвинителство Скопје поведе итна постапка против две лица – маж и жена за кривично дело Спречување службено лице во вршење службено дејствие од член 382 став 3 во врска со став 2 и став 1 од Кривичниот законик. Постапката е поведена бидејќи двајцата физички нападнале екипа – новинар и снимател на ТВ Алсат М и ги спречиле во извршување на нивните службени задачи, односно да известуваат за настанатиот пожар во близина на отпад за старо железо. Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот, додека за осомничената е предложена мерка куќен притвор, бидејќи се грижи за две малолетни деца на возраст од 9 месеци и 3 години – соопшти Обвинителството.

Во текот на вчерашниот ден и денеска се издаваат повеќе наредби и насоки за обезбедување докази.