Странка на демократска акција на Македонија (СДА) ги повикува сите политички чинители, а посебно опозициските пратеници во Собранието, навремено да се посветат на исполнувањето на сите обврски, со цел да продолжи евроатлантскиот пат на Република Северна Македонија.

-СДА Македонија ги повикува сите политички чинители, посебно опозициските пратеници, да покажат одговорност и да ја препознаат шансата за Северна Македонија да ја исполни својата стратешка цел-патот кон ЕУ. Кога се работи за стратешките цели на државата нема простор за политикантство и ситни партиски поени. Остварување на правата на помалку бројните заедници, кои денес не се спомнати во преамбулата на Уставот, дополнително ќе го демократизира нашето општество. Интегрирањето на помалку бројните заедници ќе донесе поголем потенцијал за развојот на Република Северна Македонија, во сите сфери на општеството, соопшти партијата.

Странка на демократска акција на Македонија се обрати посебно до опозицијата и ја повика да не ја блокира евроатланската иднина на државава.

-Да се биде опозиција на Владата е легитимна улога на опозицијата. Не е легитимно опозицијата да има улога во блокирањето на исполнувањето на стратешките цели на државата, да се блокира евроатланската иднина и Република Северна Македонија да се изолира од развиениот демократски свет. Ја повикуваме опозицијата да ги прифати апелите на домашната демократска јавност, но и на нашите меѓународни стратешки партнери, да го поддржи евроатланаскиот пат и што побрзо како држава да продолжиме напред. Блокадата од внатре и изолацијата од развиениот демократски свет не се решение.