Легендарниот српски фудбалски напаѓач Саво Милошевиќ откри за „Спорт Клуб“ потенцијално интересна информација дека Европската фудбалска куќа (УЕФА) не би имала ништо против организација на регионално фудбалско натпреварување, што предизвика дискусија за можноста да се создаде слично натпреварување како Јадранската кошаркарска лига, но во фудбалот.

– Работев со години во УЕФА, од прва рака знам дека УЕФА нема да има ништо против. Значи, на сите нас е, секако, прво на федерациите, а потоа федерациите преку нивните министерства да ја започнат оваа приказна, а кога ќе ја почнат, сигурен сум дека брзо ќе се најде решение бидејќи тоа е ништо комплицирано.

Такви примери имаме и во овој регион и во другите спортови и лиги, така што тоа не е нешто што не може релативно брзо да се организира и да се најде модел ако се има волја. Мислам дека сега полека веќе созрева – рече Милошевиќ.

Ова би било многу интересно, бидејќи веројатно би го засилило квалитетот на натпреварувањето, а македонските клубови можеби и би имале повеќе успеси во Европа, поради силните натпревари.

Она што многумина го посочуваат како проблем на домашните екипи, како слаби резултати во Европа, е токму таа слаба лига, односно слабите натпревари.