На почетокот на оваа година, сателитот Тера на НАСА снимил чудна формација на облаци над Мексиканскиот залив, што дава впечаток како некој да направил дупка на небото. Ова не е прв пат да се забележи овој феномен, научниците знаеле за него уште од 40-тите години на минатиот век, но само пред околу 15 години сфатиле што точно се случува.

Приказната е всушност интересна затоа што освен необичниот изглед, овие облаци имаат, може да се каже, и технолошко потекло. Имено, станува збор за облаци со кавум, кои се толку големи што можете да ги видите и од земја и од вселената. Кога се гледаат од земја, тие наликуваат на огромна кружна дупка на небото, па не е чудно што често погрешно ги сметале за „летечки чинии“ или некоја друга необична појава.

Ваквите облаци не личат на просечниот облак. Всушност, не се работи ни за вообичаениот облак, односно не би ни постоеле да ја нема технологијата. Тие се формираат кога авионите минуваат низ облаците алтокумулус. Алтокумулус се облаци кои формираат групи на неправилни бели и сиви облаци на височини од 2 до 6 километри, пишува Бизнис Инсајдер.

Тие се состојат од „супер ладни“ капки кои остануваат во течна состојба дури и на температури под нулата. Суперладењето настанува кога капките вода се екстремно чисти, без мали честички околу кои обично се формираат ледени кристали.

Алтокумулусните облаци, кои покриваат околу 8 проценти од површината на Земјата во секое време, главно се состојат од капки вода на температура од околу -15°C. Научниците на НАСА во 2010 година открија дека големината на кавумот зависи од аголот под кој авионот минува низ облаците – поплиток агол резултира со поголема „длабочина“.

Истражувањата покажаа дека такви облаци можат да се создадат од практично секој тип на авион. Сателитот Тера фати кластери на облаци со кавум на 30-ти јануари во близина на западниот брег на Флорида. Областа е дом на аеродромот во Мајами, кој има повеќе од 1.000 летови дневно.