Интерактивната изложба на академскиот графичар и графички дизајнер, Дарко Аницин, ќе биде отворена на 1 септември, во 18.30 часот, во Домот на култура „Кочо Рацин“ во Скопје.

Преку јавен повик објавен на социјални мрежи Дарко Аницин се впушта во еден вид едновремено истражување, остварувајќи интерактивен креативен контакт со што ја иницира и мотивира пубиликата да се вклучи во истражувањето и да проговори преку бојата и пигментот, да ги пренесе преку бојата своите чувства, пориви, копнежи, своите желби, мечтаења и стремежи… Целта на уметникот е еден вид истражување преку бојата како медијатор, за осознавање на психолошките состојби на дел од учесниците вклучени во истражувањето. Тој успева да искомуницира преку бојата со „испитаниците“.

Дарко Аницин (1977, Скопје) е академски графичар и графички дизајнер кој своето образование го има стекнато во средното уметничко училиште „Лазар Личеноски“, а потоа и на Факултетот за ликовни уметности при Универзитетот „Свети Кирил и Методиј“ во Скопје. Својата креативност веќе 20 години најчесто ја изразува преку ангажмани во областа на графичкиот дизајн, по што е и најпрепознатлив пред широката јавност.

Отворањето на изложбата ќе се одвива согласно протоколите и препораките за заштита од ковид-19.