Во Галерија „Ко-Ра“ – голем салон, ЈУ Дом на Култура „Кочо Рацин“ – Скопје, на 16 септември, во 20 часот, ќе биде отворена самостојната изложба „Ремек-дело на создавањето“ на академскиот графичар и графички дизајнер Дарко Аницин.

Проектот започна со објавување на јавен повик / интерактивен конкурс за учество на публиката, каде граѓаните и граѓанките праќаа по една предлог-фотографија од своето омилено планинско место / планински масив или највисоката точка/врв, која го афирмира или карактеризира поднебјето од каде што потекнуваат.

Авторот на изложбата добил фотографии со планините, планински масиви или врвови Шар Планина, Кораб, Бистра, Стогово, Јакупица, Баба, Јабланица, Галичица, Ниџе, Кожуф и Сува Гора. Откако направил избор на фотографиите, Дарко Аницин создаде 25 акрилни дела кои ќе ги претстави на интерактивната изложба.

Секое ликовно дело е именувано по одбраната фотографија, планинска област, врв..(пр. име на ликовното дело: Голем Кораб – 2.764 м. – највисока точка на Корапскиот масив).

Проектот „Ремек-дело на создавањето“ како интерактивна изложба на Дарко Аницин е поддржан од Министерството за култура преку Годинашниот конкурс за финансирање проекти од национален интерес во културата за 2024 година.

Дарко Аницин (1977, Скопје) е академски графичар и графички дизајнер кој своето образование го има стекнато во средното уметничко училиште „Лазар Личеноски“, а потоа и на Факултетот за ликовни уметности при Универзитетот „Свети Кирил и Методиј“ во Скопје.

Својата креативност веќе 25 години најчесто ја изразува преку ангажмани во областа на графичкиот дизајн, по што е и најпрепознатлив пред пошироката јавност.