Изложбата на акварели „Градски импресии“ на Елизабета Костова ќе биде отворена на 8 февруари, во 20 часот, во КСП „Центар-Јадро“ во Скопје. Авторката се претставува со триесетина акварели насликани последните две години, коишто претставуваат нејзини импресии и впечатоци од градовите во кои престојувала, ги посетила или живеела.

– Акварелот како сликарска техника со големата палета на бои Елизабета Костова успешно го применува. Боите на нејзините акварели нежно преминуваат од една во друга. Со четките и боите слика сѐ што ја опкружува, градини, цвеќиња, мртва природа, ликови на девојки, пејсажи, птици. Голема инспирација се и старите македонски градови или делови од нив. Тесни улички, ниски куќи на приземје и кат, тесно збиени една до друга и со надвиснати еркери над улиците. Оџаци од кои се извива сивиот дим. Насликани се со прекрасни палети од бои, сина, зелена, лилава, жолта… црвени кровови и секако пространото сино небо над нив, кое се гледа и од уличките. И овде белите полиња на подлогата помеѓу топлите бои даваат посебна светлина. Од овие акварели зрачи и светлина и радост – истакнува Натка Ќосева, дипл.инж.арх.

Акварелните решенија на Елизабета Костова претставуваат витални и флуидни репрезентации кои осцилираат помеѓу реалното и фантастичното. Во нив се остварува прониклив дијалог меѓу виденото и споменот од чија интеракција произлегува специфичниот колорит осветлен од меморијата.

– Низ оваа прошетка во урбаната средина формирана од колоритни фрагменти си спомнуваме за периоди од нашето животно патешествие. Тоа се впечатоци кои нѐ водат низ енигмата на сеќавањата, нивната веродостојност, одржливост и променливост предизвикани од временските интервали на субјективното поимање. Напорот кој го прави Елизабета е да ја зачува сликата на едно секојдневие кое додека се виртуализира сè помалку ни припаѓа лично и ги губи контурите на нешто допирливо и човечно – посочува Васко Ѓоргиев, претставник на ДЛУБ.

Елизабета Костова целиот свој работен век го поминала и работела како психолог. Родена е во 1953 година во Скопје. Основно и средно образование завршила во Скопје. Дипломирала на Филозофскиот факултет во Љубљана, отсек психологија. Реализирала повеќе самостојни изложби во Дом на АРМ, Скопје (1989 и 1991 г.), Галерија на ДЛУМ, Скопје (2002 г.), во Домот на култура „Иван Мазов – Климе“, Кавадарци (2020 г.), како и во Галерија „Ко-Ра“, Скопје (2019, 2020 и 2023 г.). Исто така, учествувала и на повеќе групни изложби.