Археолошкиот парк Колосеум во Рим и американската компанија за изнајмување станови „Ербиенби“ ќе им понудат на 16 туристи можност да учествуваат на гладијаторска претстава следниот мај како дел од проектот „Колосеумот ја раскажува својата приказна“, а ќе имаат пристап и до подземјето на амфитеатарот и арената по неговото затворање, пренесува „Еуроњуз“.

Со договорот меѓу „Ербиенби“ и Археолошкиот парк на туристите им се нуди можност да се трансформираат во гладијатори на еден ден, а во замена ќе се издвојат 1,1 милион евра за проектот за реновирање на музејот и постојаната поставка во античкиот амфитеатар.

„Оние кои се доволно храбри да се спротивстават на предизвикот ќе ги следат стапките што некогаш ги поминале победничките борци, ќе се облекуваат во историски точен оклоп и ќе ги стават своите вештини на тест за да ја одредат својата судбина во битка“, се вели во соопштението за новото гладијаторско искуство.

„Покровителот ќе ве сретне во Колосеумот по зајдисонце и ќе ве одведе внатре. Без разлика дали ќе излезете од оваа ноќ победник или победен, знајте го ова -вашите очи ќе прифатат глетка која не е често видена“, се додава во соопштението.

Оваа несекојдневна понуда е инспирирана од филмот „Гладијатор 2“, кој моментално е актуелен и веќе се прикажува во кината.

Меѓутоа, одлуката беше критикувана од италијанските власти, а советникот на Министерството за култура Масимилијано Змерило го повика Археолошкиот парк да се откаже од оваа иницијатива, нарекувајќи ја „комодификација на културата“.

„Колосеумот е светско наследство и мораме да го заштитиме, се разбира, но и да го направиме достапен за секого и да спречиме да стане место за шеги на неколку избраници“, рекла претседателката на Комисијата за култура на Рим, Ерика Батаља.

Инаку, гостите можат да побараат бесплатно да резервираат едно од двете тричасовни искуства на 7-8 мај 2025 година.