Салата „Цезар“ според оригиналниот рецепт на Цезар Кардини
Вистинската салата „Цезар“, според рецептот од 1924 година на Цезар Кардини.
Препорачано
Кардини бил познат италијански готвач, кој поради подобра егзистенција, ја напуштил својата земја во 1920 година, во потрага за исполнување на американскиот сон. Но, патот од Америка го одвел во Мексико каде отворил и свој ресторан. Во 1924 година ја измислил салатата наречена (по него) Цезар, а всушност, таа салата ја приготвувале неговите вработени за да ги услужат побрзо гостите (главно, Американци), пред да им пристигне главното јадење, кои пристигнувале тука за да се забавуваат и да се напијат.
Салатата „Цезар“ набрзо станала популарно предјадење кое полека се проширило низ светот. Денес, пак, поради богатите состојки што ги содржи, многумина ја сметаат и за лесен ручек или вечера.
Веројатно сте пробале најразлични салати „Цезар“, често и мешавини од сè и сешто, модерни варијанти, со различни (дури и непотребни) додатоци.
Состојки:
– 5 изгмечени чешниња лук
– 4 лажици маслиново масло
– сок од 1 лимон
– 2 лажичи (ворчестер) сос
– 1 лажица сенф
– 1,5 лажица бел вински оцет
– 4 јајца
– 2 подебели парчиња домашен леб
– 2 лажици маслиново масло
– 100 грама пршута
– листови марула
– 50 грама пармезан
– сол и бибер
Подготовка:
Исечкајте го лебот на коцки и прелијте го со маслиново масло, посолете и наросете мелен црн пипер. Печете ги парчињата леб 15 минути, додека не поруменат, а потоа оставете ги да се изладат.
Ставете ја пршутата да се пече 3 минути додека не стане крцкава. Изгмечете го лукот со преостанатото маслиново масло и додадете го лимоновиот сок, сосот „ворчестер“, сенфот и оцетот, па добро промешајте. Потоа во салатата додадете ги ровко сварените жолчки од јајцата и уште еднаш промешајте.
Сервирајте ја салатата „Цезар“ врз зачинетите листови марула. Додадете ги коцките леб, пршутата и пармезанот и наросете со мелен црн пипер.
