Градоначалникот на Лондон Садик Кан формираше специјален тим кој треба да помогне во зајакнувањето на ноќниот живот во Лондон и да ги спаси местата што се изложени на ризик од затворање, јавуваат британските медиуми.

Ова следи по предупредувањата дека ноќниот живот во Лондон и натаму се бори со последиците на ковид пандемијата и брегзит, како зголемени кирии, пад на посетеност, проблеми со ангажирање персонал и зголемени трошоци за живот.

Таканаречениот „Специјален тим за ноќен живот“, составен од 11 независни професионалци од секторот е формиран за да ги разгледа предизвиците и можностите на „ноќната економија“ и да најде начини за нејзино подобрување. Кан вели дека оваа економија е клучна за успехот на Лондон, но дека таа се соочува со низа предизвици.

„Решен сум да направам сѐ што можам и да работам заедно со нашата ноќна индустрија, поради што ја составив оваа независна група од експерти за да ги испита можностите и да ги реши проблемите со кои се соочува индустријата“, рече градоначалникот Кан.

Минатата година, претставниците на секторот кажаа во градското собрание дека ноќните клубови се доведени до раб на затворање поради строгите закони за лиценцирање, проблемите со криминалот и зголемените трошоци.