САД почнаа да го намалуваат бројот на своите војници во Сирија, намалувајќи го своето присуство во земјата од осум воени бази на три, со крајна цел да задржат само една, изјави специјалниот американски пратеник за Сирија, Томас Барак, во интервју за турската телевизија НТВ.

Барак изјави дека е во тек намалување на американската мисија за борба против екстремизмот во земјата.

„Ќе преминеме од осум бази на пет, потоа на три бази, и ќе завршиме со една база“, рече Барак.

Тој додаде дека американскиот претседател Доналд Трамп јасно изјавил дека нема да има повлекување, туку постепена реконсолидација и дека бројот на војници на терен нема да се зголемува, туку ќе се намалува.

Кон средината на април, САД објавија дека ќе го преполови своето воено присуство во Сирија, велејќи дека „успешно“ ја победиле групата Исламска држава, иако екстремистичките групи остануваат активни во земјата, која е во процес на транзиција, пишува агенцијата Франс Прес.

Според Пентагон, присуството на САД во Сирија ќе се намали на помалку од илјада војници во текот на наредните месеци од околу 2.000 колку што се моментално распоредени.