Претстојните разговори меѓу руски и американски претставници во Саудиска Арабија треба да утврдат што може да се направи за да се стави крај на војната во Украина, изјави денеска портпаролката на американскиот Стејт департмент Тами Брус.

Таа денеска пред новинарите во Ријад изјави дека состанокот, на кој ќе учествуваат американскиот државен секретар Марко Рубио, советникот за национална безбедност на Белата куќа, Мајк Волц и пратеникот за Блискиот Исток, Стив Виткоф, е чекор за да се утврди дали Русите се сериозни во врска со мировните преговори, пренесува Ројтерс, пренесува Танјуг.

„Ова е продолжение на првичниот разговор меѓу (рускиот претседател Владимир) Путин и (американскиот претседател Доналд) Трамп за тоа дали тој чекор е воопшто можен, кои се интересите и дали може да се управува со него“, рече Брус.

Американскиот државен секретар Марко Рубио треба да се сретне со руски претставници во Саудиска Арабија, а на средбата ќе присуствуваат и советникот за национална безбедност на американскиот претседател Доналд Трамп, Мајк Волц и пратеникот на Белата куќа за Блискиот Исток, Стив Виткоф.

Москва потврди дека рускиот министер за надворешни работи Сергеј Лавров и помошникот на рускиот претседател Јуриј Ушаков заминуваат за Ријад.

Путин и Трамп разговараа телефонски минатата недела, по што Трамп разговараше и со украинскиот претседател Володимир Зеленски.