САД мора да вложат повеќе напори за да бидат поуспешни во конкуренцијата со Кина, рече американската секретарка за трговија Џина Раимондо, истакнувајќи во исто време дека Вашингтон не се обидува да ги прекине врските меѓу двете најголеми светски економии. Предностите на Америка во конкуренцијата со Кина се силните универзитети, милијардите долари владино финансирање за производство и истражување на полупроводници и силни сојузници ширум светот, нагласи Раимондо.

„И покрај сите овие предности ефикасното натпреварување со Кина нема да биде лесно, ќе бара напорна работа од сите, не само од владата“, рече Раимондо.

Таа претстави нова стратегија за поуспешна конкуренција. „Имаме намера да го зајакнеме нашиот систем за контрола на извозот, да ги подобриме механизмите за проверка на инвестициите, да ја зајакнеме отпорноста на нашиот синџир на снабдување и да развиеме иновативни решенија како одговор на кинеската економска принуда и кршењето на човековите права“, рече Раимондо.

Aмериканската стратегија за контрола на извозот е „прилично реактивна“ и се фокусираше на обидот да ја спречи Кина да ги прошири своите технолошки способности откако обезбеди пристап до американската интелектуална сопственост, рече министерката за трговија на САД.

Во октомври, Министерството за трговија објави серија мерки за контрола на извозот, сериозно ограничувајќи го пристапот на Кина до американската технологија за производство на чипови и значително ги засили напорите за ограничување на технолошкиот и воениот напредок на Пекинг.

САД работат со сојузниците на ограничувањата на извозот на алатки за производство на полупроводници и се надеваат дека „ќе преземат чекори слични на нашите“, им рече Раимондо на новинарите во вторникот.