Министерството за правда на САД побара еднодневна затворска казна за полицаец осуден за смртта на млада афроамериканска медицинска сестра, казна што адвокатите што ја застапуваат жртвата ја нарекоа „навреда“.

Полицаецот, Брет Ханкисон, беше прогласен за виновен во ноември од страна на поротата во Луисвил по обвинение за кршење на граѓанските права на жртвата.

Министерството за правда на САД побара еднодневна затворска казна за полицаецот кој ја уби 26-годишната Афроамериканка Бреона Тејлор. Tаа потоа стана икона на движењето „Животот на црнците е важен“.

Пред изрекувањето на пресудата на 21 јули, Министерството за правда препорача во документ поднесен до судот во среда обвинетиот полицаец да биде осуден на еден ден затвор, казна што веќе ја отслужил од апсењето на почетокот на постапката, придружена со три години условна казна.

Невообичаено, препораката не ја потпишал обвинителот задолжен за случајот, туку помошничката државен обвинител за граѓански права Хармит Дилон, конзервативна адвокатка која беше назначена на оваа стратешка позиција од претседателот Доналд Трамп.

„Владата ја почитува пресудата на поротата, која гарантира дека обвинетиот Ханкисон никогаш повеќе нема да служи во полициските сили и веројатно никогаш повеќе нема да може да поседува огнено оружје“, се вели во документот.

Но, изрекувањето потешка казна би било „неправедно“, рече таа, нагласувајќи дека „иако тој пукал на слепо десет пати во нејзиниот стан (…) тој ден не ја повредил неа или некој друг“.

Според Дилон, тој почнал да пука откако партнерот на жртвата пукал и ранил еден од неговите колеги.

Адвокатот кој го застапувал семејството на жртвата, Бен Крамп, кој е особено познат по тоа што често се занимава со случаи на полициска бруталност против малцинствата, ја опиша препораката како „навреда на животот“ на жртвата и „срамно предавство на одлуката на поротата“.

„Препорачувањето само еден ден во затвор испраќа неоспорна порака дека белите полицајци можат да ги прекршат граѓанските права на црните Американци со речиси целосна неказнивост“.

Бреона Тејлор беше застрелана од најмалку осум полицајци во нејзиниот стан во Луисвил, Кентаки, на 13 март 2020 година.

Тројца полицајци влегоа во нејзиниот стан ноќе без да тропнат или да се идентификуваат, како дел од истрага за дрога насочена кон нејзиното поранешно момче.

Нејзиното тогашно ново момче ги помешало со крадци и пукало во нив со пиштол што го поседувал легално. Полицајците возвратиле, пукајќи најмалку триесет пати.