Администрацијата на американскиот претседател Доналд Трамп се подготвува да го ослободи рускиот сајберпрестапник Александер Виник како дел од размената со Москва во која американскиот наставник Марк Фогел, осуден на 14 години затвор во Русија за поседување марихуана, вчера беше ослободен од руски затвор.

Ова денеска го објави „Њујорк тајмс“ повикувајќи се на тројца неименувани владини претставници.

Изворите укажале дека во тек е подготовка на Русија да биде предаден Александар Виник, кој во 2024 година се изјасни за виновен за перење пари, како дел од размената за Фогел. Еден од претставниците изјавил дека Виник сторил ненасилно кривично дело и дека во рамките на размената се откажува од имот вреден десетици милиони долари.

Виник управувал со берзата за криптовалути „BTC-e“. Тој беше уапсен во Грција на барање на американските власти кои веруваа дека тој е одговорен за перење на четири милијарди долари преку размена.

Тој се изјасни за виновен за обвиненијата во мај минатата година, а му се закануваа 20 години затвор во САД.

Според американското Министерство за правда, BTC-e го користеле сајбер-криминалците ширум светот за пренос, перење и складирање на приходите од нелегални злосторства, вклучително и хакерски инциденти, напади со откупнина, шеми за кражба на идентитет, корумпирани јавни службеници и продажба на дрога.

Русија ослободи наставник од САД кој беше осуден на 14 години затвор за марихуана