Американските власти истражуваат неовластено објавување доверливи документи за израелските планови за напад врз Иран, јави Асошиетед прес, повикувајќи се на свои извори во Вашингтон.

Изворите оцениле дека се автентични документите со датуми од 15 и 16 октомври, со ознака „строго доверливо“. Тие содржат ознаки дека се достапни само за функционери од САД, Австралија, Канада, Нов Зеланд и Обединетото Кралство. Во документите се опишуваат подготовките на Израел за напад врз Иран.

Во истрагата се проверува кој имал пристап до документите пред да бидат споделени на интернет, дали биле преземени со хакерски напад, но и дали можеби тоа е намерен потег на разузнавачката заедница.

Официјален Вашингтон бара од Израел да се воздржи од ескалација на војната, а израелското раководство тврди дека нема да се откаже од одговор на иранскиот напад со 180 проектили на почетокот на октомври.