САД и Филипините спроведуваат заеднички патроли во Јужното Кинеско Море и воздухот над него, недалеку од Тајван.

Двете земји ја интензивираат соработката поради зголемените активности на Кина во таа област.

Филипинските воздухопловни сили денеска соопштија дека нивните авиони вчера учествувале во заеднички патроли во близина на Батанес, најсеверната провинција на Филипините, која е на само околу 200 километри од Тајван.

Патролирањето на американската и филипинската морнарица би требало да трае до утре.

Филипинскиот претседател Фердинанд Маркос Џуниор претходно изјави дека ситуацијата во Јужното Кинеско Море станува се потешка, бидејќи Кина се обидува да го потврди своето присуство во област, каде повеќе држави имаат спротивставени територијални претензии.

Кина тврди дека речиси целото Јужно Кинеско Море е нејзино, што доведе до спорови не само со Филипините, туку и со Виетнам, Малезија, Тајван и Брунеи. Тоа е исто така една од точките во спорот меѓу Кина и САД.