Белоруската тенисерка, Арина Сабаленка за првпат се огласи по смртта на поранешниот хокеар Константин Колцов кој почина на 43-годишна возраст. За јавноста беше познато дека тие двајца се во врска, но според последната објава на тенисерката пред извесен период се разделиле.

Се уште не е позната точната причина за смртта на Колцов, а во овие моменти сомнежите водат кон самоубиство.

„Смртта на Константин за мене е незамислива трагедија, иако повеќе не бевме заедно, срцето ми е скршено. Ве молам да ја почитувате мојата приватност и приватноста на неговото семејство во овој тежок момент“, објави Сабаленка.

Сабаленка ќе настапи на турнирот во Мајами и покрај трагедијата, но ќе нема обврска да се појавува пред новинарите на вообичаените прес-конференции. Засега не е познато кога парот се разделил, но Колцов беше поддршка на Сабаленка на Австралија Опен каде што втората тенисерка во светот успеа да ја одбрани титулата.