Актуелната шампионка на САД Опен, Арина Сабаленка, обезбеди пласман во полуфиналето на турнирот и тоа без да излезе на терен. Нејзината противничка, Чехинката Маркета Вондрушова, поради повреда на коленото беше приморана да го предаде четвртфиналниот меч пред истиот да започне.

„Жал ми е што морам да соопштам дека нема да можам да настапам. Се обидов да издржам, но уште за време на загревањето почувствував силна болка. По консултација со лекарите, донесовме одлука да не ризикуваме со влошување на состојбата“, изјави Вондрушова.

Чехинката и минатата година се мачеше со повреди, поради проблеми со рамото го пропушти минатиот САД Опе, а по кратко враќање во февруари, повторно беше надвор од терените три месеци.

За Сабаленка, ова е 11. полуфинале на последните 12 грен-слем настапи, а во борба за пласман во финалето, Белорусинката ќе се сретне со Американката Џесика Пегула.