Сѐ поголем број на желки се населуваат и несат јајца на плажите на западниот Медитеран, а некои научници сугерираат дека тоа би можело да биде резултат на климатските промени, кои предизвикуваат проширување на живеалиштата на загрозените видови.

Заедно со затоплувањето на морската вода, уште еден фактор кој најверојатно е последица за ваквите промени кај најголемата желка во светот, која се смета за ранлив вид, се програмите за зачувување во земји како Шпанија и Зеленортските Острови.

Морските биолози од Франција, Италија, Шпанија и Тунис открија многу повеќе гнезда на плажите на нивните земји во изминатата деценија отколку во 1990-2012 година, кога во просек имаше помалку од три гнезда годишно.

Од 2012 година, бројот на гнезда драстично се зголемил, достигнувајќи 84 во 2020 година, најновите достапни податоци, се вели во написот објавен минатото лето во научното списание за животна средина „Глобал Еколоџи и Консервејшн“.

„Сметаме дека овој тренд би можел да биде нов процес на колонизација“, рече биологот Ана Лирија, раководител на „АДС Биодиверсидад“, добротворна организација со седиште во Талиарте на островот Гран Канарија.

Групата спасува повредени желки на Канарските острови во Шпанија и ја проучува нивната популација во Зеленортските Острови, главното подрачје за размножување во источниот дел на Атлантикот.

Желките се населуваат во потоплите делови на светските океани и се присутни во Средоземното Море, но тие главно се гнездат на неколку места како Флорида, Зеленортските Острови, Оман, Мозамбик и Западна Австралија.

На секои неколку години се враќаат во своето „родно место“ за да ги снесат јајцата.

Медитеранот се загреал за 1,3 степени Целзиусови помеѓу 1982 и 2019 година, според студијата од 2020 година на еколошката фондација ЦЕАМ со седиште во Валенсија.

Климатските промени обично се штетни за дивиот свет, но потоплите води очигледно ги направија попогодни за желките, рече Лирија, предупредувајќи дека нивниот животен век до 100 години значи дека секоја промена во однесувањето мора да се проучува во многу подолги периоди.

Успешните програми за зачувување на желките започнати на глобално ниво во текот на изминатите децении, исто така, ја зголемија популацијата на желките, помагајќи да се подигне нивниот статус над „загрозениот“ во многу области, рече таа.

Еден зрел примерок може да биде 90 cm и тежок 150 kg.

Нивната големина и тврда обвивка генерално ги штитат од предатори, но рибните мрежи, бродските пропелери и загадувањето станаа значајни закани.