Македонската група „Ареа“ има култен статус меѓу љубителите на квалитетната рок музика, а голем број од нивните песни веќе важат за вистински евергрини.

Нивните обожаватели со нетрпение ги очекуваат двата акустични концерти, кои рок музичарите од Гостивар ќе ги одржат на 19 и 20 април во Македонската филхармонија во Скопје.

„Ареа“ има чести настапи пред својата слушачка публика, но тие одамна не ги испеале своите најголеми хитови во акустична верзија. Поточно, поминаа 14 години од последните акустични концерти на „Ареа“ во Универзалната сала.

„Свежи ни се сеќавањата на тие концерти во Универзална сала. Нам ни беше многу тажно кога ја гледавме како гори. Кога изгоре Универзална, како да изгоре душата на Скопје. Се надеваме дека повторно ќе се издигне како феникс.

Ние сме имале безброј концерти во таа сала, сме свиреле на манифестации и сме настапувале како гости на концерти на наши колеги“, изјави пејачката на „Ареа“, Ружица Милошевска – Брчиоска, на денешната прес-конференција.

Гитаристот на групата Ивица Брчиоски најави дека концертот ќе биде интересно искуство за публиката бидејќи аранжманите ќе бидат изменети и прилагодени на оркестарот со кој ќе свират.

„Станува збор за акустични аранжмани. Нема да има електрични гитари и ќе звучи сосема поразлично од она што до сега го слушнала публиката. Ќе биде интересно за слушање“, додаде Брчиоски.

Првиот концерт, кој е закажан на 19 април, е веќе распродаден, а за вториот концерт (на 20 април) има уште многу мал број влезници. Двата концерти се во организација на„Фреш јунион“.