Во тајните документи од Пентагон, кои се појавија на платформата Дискорд, се наведуваат тврдењата на оние што ги управуваат лажните руски профили дека платформите на социјалните мрежи на кои шират руски дезинформации и пропаганда ги препознаваат само во еден процент од случаи. Во документите се наведува дека оваа руска дезинформативна мрежа е позната како „Фабрика“.

Тврдењето е детално опишано во анализата на ефикасноста на Русија во ширењето на својата пропаганда на платформи како Твитер, ТикТок, Телеграм и Јутјуб.

Документот, кој го виде американскиот весник Вашингтон пост и нуди ретка искрена проценка на американското разузнавачка служба за руските операции за дезинформирање, нема датум, но се однесува на интернет активности од крајот на 2022 година. Се чини дека е подготвен од Здружениот генералштаб на Армијата на САД, Командата за кибер-одбрана на САД и Европската команда на американската армија, која управува со воените активности на САД во Европа.

Документите се повикуваат на разузнавачки сигнали, кои вклучуваат прислушување, но не наведуваат извори за заклучоците донесени во нив.

Како што се наведува, мрежата „Фабрика“ е дел од главниот руски научно-истражувачки компјутерски центар, кој работи директно за претседателската администрација и чија цел е да ја подобри работата за ширење дезинформации. Кон крајот на 2022 година, центарот работеше на усовршување на мрежата „Фабрика“, се вели во анализата, во која се заклучува дека „напорите веројатно ќе ја подобрат способноста на Москва да ја контролира домашната информациска средина и да промовира проруски наративи во странство“.

Анализата покажа дека „Фабриката“ била успешна, иако западните санкции против Русија и руската цензура на социјалните медиуми во земјата претставувале дополнителни тешкотии.

„Ботовите гледаат одредена содржина, лајкнуваат, се претплатуваат и повторно објавуваат. Манипулираат со бројот на прегледи за да ја направат содржината повидлива во резултатите од пребарувањето и листите со препораки“, се вели во резимето.

Се додава дека во други случаи „Фабрика“ испраќа содржина директно до „обичните“ корисници откако ќе ги собере нивните детали, како што се адресите од електронска пошта или телефонските броеви од базите на податоци. По обидот на Русија од 2016 година да се вмеша во претседателските избори во САД, платформите за социјалните мрежи станаа построги кога станува збор за верификација на корисниците, вклучувајќи ги и телефонските броеви. Русија одговори, најмалку во еден случај, со купување на СИМ-картички на големо, што функционираше додека социјалните мрежи не ја забележаа шемата. Русите сега се завртеа кон компании кои можат да добијат помалку забележливи телефонски броеви, се вели во документот.

Во извештајниот документ се истакнува дека целите на руската кампања за влијание вклучувале деморализирање на Украинците и создавање поделби меѓу западните сојузници.

Во друг строго таен документ од истиот сеф на Дискорд се зборува за шест конретни кампањи за влијание што новата руска организација, Центарот за специјални операции во сајбер просторот, ги планира за оваа година.

Целта на новата група главно се регионалните сојузници на Украина, се вели во документот. Кампањите вклучуваа ширење на идејата дека американските власти ги кријат несаканите ефекти од вакцините, со намера да поттикнат поделба на Запад. Друга кампања се фокусираше на тврдењето дека украинската бригада Азов делува казнено во источниот регион Донбас.

Третата кампања беше насочена кон Латвија, Литванија и Полска кои сакаат да ги вратат украинските бегалци назад во борбата, кон украинската безбедносна служба која регрутира вработени во Обединетите нации за да шпионираат, како и кон тоа дека Украина употребува операции за влијание против Европа со помош на НАТО.

Завршната кампања има цел да ги открие идентитетите на украинските „информациски војници“, луѓе на спротивната страна на пропагандната војна којашто се одвива паралелно со борбите во Украина.

Експерти: Тврдењата на руските специјалисти за дезинформации веројатно се претерани

Откритијата за зголемената способност на Русија да шири дезинформации доаѓаат откако сопственикот на Твитер, Илон Маск и некои републиканци во Конгресот ја обвинија сојузната влада дека е во дослух со технолошките компании, за заеднички да ги потиснат десничарските и независните ставови, така што премногу профили означија како „ширачи“ на руски влијание.

Експерти за разузнавачка и технолошка безбедност со кои разговарал „Вашингтон пост“ предупредија дека руската агенција, чии тврдења беа основа за објавениот документ, можеби ја преувеличила својата стапка на успех од само еден процент од откриените сметки.

Но, дури и ако лажните сметки на Русија избегнаа да бидат откриени во 90 отсто од случаите, наместо во 99 отсто, како што велат документите, тоа би покажало дека Русија станала многу повешта во ширењето на своите ставови отколку во 2016 година. Тогаш Русија комбинираше бот-сметки со човечки пропагандисти и хакирање за да влијае на текот на претседателските избори во САД, велат експертите.

„Да бев владата на САД, ќе го сфатев ова сериозно, но мирно“, изјави за Вашингтон пост поранешниот шеф на британската агенција за сајбер одбрана.

Томас Рид, експерт за дезинформации и професор на Универзитетот Џон Хопкинс, за Вашингтон пост изјави дека Гугл, Мета и другите платформи на социјалните медиуми се обидуваат да ги спречат руските дезинформации, но дека Русија се обидува да биде уште поефикасна. Тој додаде дека тврдењето за еден процент е веројатно претерано или погрешно-наведувачко.

Американското Министерство за одбрана одби да коментира. ТикТок, Твитер и Телеграм, сите именувани во документот како цели на руските разузнавачки операции, исто така не одговорија на барањето за коментар.

Малку се знае за алгоритмите на социјалните мрежи

Просечниот интернет корисник поминува повеќе од два часа дневно на социјалните мрежи. Затоа Интернетот стана можеби и водечкото место за дијалог и дискусија за актуелни настани, култура и политика. Затоа, она што можеме да го видиме и прочитаме на социјалните мрежи добива на важност. Но, малку е познато како одредена содржина им се прикажува на корисниците. Големите технолошки компании ги кријат алгоритмите што ги движат нивните сајтови, додека пак, маркетинг компаниите и владите користат инфлуенсери и автоматизирани алатки за да проследуваат пораки од секаков вид.

Анализата на ефикасноста на Русија во ширењето пропаганда на Твитер, Јутјуб, ТикТок и Телеграм и други социјални мрежи опфаќа активности што се случиле кон крајот на 2022 година и наводно им била претставена на американските воени претставници во претходните месеци. Дел од документите се оние кои циркулираа на платформата Дискорд, а до кои дојде Вашингтон пост. На интернет протекоа десетици високо доверливи документи, кои откриваат чувствителни информации наменети за високи воени и разузнавачки службеници. Членот на Воздухопловната национална гарда Џек Тешеира е осомничен за објавување доверливи разузнавачки информации, за што му се заканува затворска казна до 15 години.

Извор: Demostat Автор : Тамара Бајчиќ