Како одговор на израелските напади, Иран би можел да го затвори Персискиот Залив, што би предизвикало драматичен скок на цените на нафтата и дестабилизација на глобалниот енергетски пазар, предупреди рускиот сенатор Алексеј Пушков во објава на „Телеграм“.

„Иран ја разгледува можноста за блокирање на Ормускиот Теснец, кој го поврзува Персискиот Залив со Индискиот Океан. Доколку тоа се случи, светскиот пазар на нафта ќе биде сериозно дестабилизиран, а цените на нафтата би можеле нагло да скокнат – според проценките, дури и до 110 или 130 долари за барел“, напиша Пушков, а пренесоа руските медиуми.

Тој додаде дека на Иран би можеле да му се придружат јеменските Хути, кои би можеле да го блокираат теснецот Баб ел-Мандеб, клучен поморски пат помеѓу Индискиот Океан и Црвеното Море, што води до Суецкиот канал.

„Во тој случај, зголемувањето на цените би било уште поизразено“, истакна Пушков.

Израелските напади врз Иран и заканата од нуклеарна ескалација

Во ноќта на 13 јуни, Израелските одбранбени сили (ИДФ) започнаа широка воена операција во која воздухопловните сили извршија напади врз воени цели и објекти поврзани со нуклеарната програма на Иран.

Израелските власти објавија дека целта на операцијата е да се елиминира непосредната закана за опстанокот на израелската држава, наведувајќи дека, според воените и разузнавачките податоци, Иран се приближува кон „точката од која нема враќање“ во развојот на нуклеарно оружје. Во нападите загинаа десетици луѓе, меѓу нив и неколкумина високи команданти на иранската војска, како и нуклеарни научници. Погодени се повеќе постројки за збогатување ураниум во земјата.

Иран одговори со четири бранови ракетни напади врз Тел Авив, Ерусалим и повеќе други израелски градови, во кои според последните информации, загинале тројца луѓе, а преку 80 се повредени.

ВИДЕО: Израелски авиони удираат врз Иран, ирански ракети паѓаат врз Ерусалим и Тел Авив