Украинскиот претседател Володимир Зеленски денеска изјави дека повеќе од 100.000 луѓе останале без греење во пристанишниот град Миколаев по нападот на руско беспилотно летало врз енергетската инфраструктура.

„Оние кои сакаат да го вратат мирот и се подготвуваат за преговори не го прават тоа“, рече Зеленски, прецизирајќи дека тимовите на терен работат на обновување на греењето во Миколаев.

Зеленски ги повика сојузниците на Киев да реагираат силно и да работат заедно за да ја принудат Русија да склучи мир.

Регионалниот гувернер Виталиј Ким изјави дека нападот предизвикал пожар, кој пожарникарите брзо го ставиле под контрола.

Според него, 64-годишен маж е повреден во бомбардирањето и хоспитализиран, а оштетени се пет станбени згради.

Русија редовно ја бомбардира енергетската инфраструктура на Украина, предизвикувајќи прекини на струја, гас и греење. Москва го негира ова, наведувајќи дека е насочена само кон структури кои ја снабдуваат украинската војска.