Руската армија наводно извршила егзекуција на 16 украински воени заробеници, поради тоа Украина отвори истрага. Наводно, ова се случило во близина на Покровск, важен град на истокот на земјата, соопшти денеска државното обвинителство во Киев.

„Ова е најмасовниот познат случај на егзекуција на украински воени затвореници на линијата на фронтот“, објави главниот државен обвинител Андриј Костин,  во соопштение од неговата канцеларија со тврдење дека „убиствата и тортурата на затворениците не се коинциденција, туку намерна политика“ на Русија.

Обвинителството наведе дека има информации дека „најмалку 92 украински војници кои се предале биле егзекутирани на бојното поле“, и дека оваа бројка го вклучува и она што се случило во близина на Покровск.