Руската армија денеска го најави почетокот на третата фаза од вежбите за распоредување на нестратешко нуклеарно оружје, при што ќе се разработуваат прашања за подготовка на единиците на вооружените сили на Руската Федерација за борбена употреба на ова оружје.

„Во согласност со одлуката на претседателот на Руската Федерација, започна третата фаза од вежбата на нестратешко нуклеарни сили“, соопшти Министерството за одбрана.

Војниците од јужниот и централниот воен округ ќе бидат обучени како да распоредуваат лажни боеви глави за оперативните и тактички ракетни системи Искандер-М и тајно да ги преместуваат на локации за лансирање, додаде Министерството.

Според наведеното сегашната фаза на вежбата има за цел да ја одржи подготвеноста на персоналот и опремата на единиците за борбена употреба на руското нестратешко нуклеарно оружје за извршување на борбени задачи.

Инаку, во текот на првата и втората фаза беа решени прашањата за подготовка на единиците на јужниот и ленинградскиот воен округ, единиците на воздухопловните сили и морнарицата за борбена употреба на нестратешко нуклеарно оружје. За потсетување Русија ја одржа првата фаза од вежбите во мај, а Белорусија се приклучи на втората фаза во јуни, пренесува Танјуг.