Руските сили ја контролираат најголемата нуклеарна централа во Украина, изјави шефот на Меѓународната агенција за атомска енергија (МААЕ), повикувајќи се на информации од Москва.

Руските дипломати во Виена го информираа генералниот директор на МААЕ Рафаел Гроси за случувањата, Како што се наведува во писмото упатено од руската амбасада до МААЕ, персоналот на нуклеарната централа Запорижија продолжува да обезбедува безбедна работа и дека нивоата на радијација се во нормала.

Во Украина, која минатата недела беше нападната од Русија, работат 15 нуклеарни реактори во четири електрани. Гроси веќе предупреди на ризикот од сериозна нуклеарна несреќа додека борбите низ земјата продолжуваат.

Управниот одбор на МААЕ треба да се состане во среда за да разговара за ситуацијата.

Претходно Киев ја информираше МААЕ дека е во контакт со сите нуклеарни централи низ земјата и дека тие работат нормално.

Според Антон Херашченко, советник во Министерството за внатрешни работи на Украина, руските сили се обидуваат да заземат и нуклеарна централа во јужна Украина, на околу 350 километри од Запорижје. Во тој правец се упатија неколку хеликоптери.

Руските сили минатата недела зазедоа затворена нуклеарна централа во Чернобил. Имаше мало зголемување на отчитувањата на радијацијата на местото на нуклеарната катастрофа во 1986 година, откако радиоактивната прашина се разнесе поради движењето на воените возила.