Долниот дом на рускиот Парламент – Државната дума денеска го одобри буџетот на Руската Федерација за 2024 година. Во него се предвидува зголемување на расходниот дел за околу 25 отсто, а рекорден дел од таа сума е наменет за воени цели.

За прв пат во модерната руска историја, трошоците за одбрана се очекува да ги надминат социјалните плаќања утврдени во државниот буџет.

Пратениците од групата на Комунистичката партија на Руската Федерација гласаа против бидејќи, според нив, новиот буџет не обезбедува доволно финансиска поддршка за старите лица, поради што нивните пензии ќе останат ниски.

Руското Министерство за финансии соопшти дека очекува расходниот дел од буџетот во 2024 година да достигне 36,66 трилиони рубљи (410,48 милијарди долари). Се предвидува дека буџетскиот дефицит ќе изнесува 0,8 отсто од бруто домашниот производ (БДП) на Русија.