Рускиот медиумски регулатор го блокираше пристапот до францускиот канал Еуроњуз како дел од зајакнувањето на контролата врз информациите поврзани со рускиот напад врз Украина. Според руските новински агенции, Роскомнадзор го блокирал euronews.com и неговата руска верзија ru.euronews.com на барање на обвинителството. Причините за блокадата не се наведени.

Од почетокот на руската интервенција во Украина на 24 февруари, руските власти значително ја зајакнаа контролата врз информациите објавени на интернет. На многу руски и странски медиуми, вклучително и Би-Би-Си, им беше забранет пристапот, а Фејсбук и Инстаграм беа прогласени за „екстремистички“ од московскиот суд.

Пристапот до Твитер е исто така ограничен. Роскомнадзор ги обвини и Гугл и Јутјуб за „терористички“ активности, што е прв чекор кон можна блокада.