Русија ги ослободи новинарот на Вол Стрит Журнал, Еван Гершкович и поранешниот американски маринец Пол Вилан во размена на затвореници, пишува Блумберг.

Двајцата мажи, кои беа затворени во Русија под обвинение за шпионажа што тие и САД ги негираат, се упатуваат кон дестинации надвор од Русија.

Фокс њуз објави дека затворениот новинар на Волстрит журнал Еван Гершкович ќе се врати во САД во размена на затвореници, веројатно подоцна во четврток.

Ставот на Кремљ

Се потсетува дека претходно Кремљ одби да ги коментира извештаите во кои се наведува дека ќе започне размена на затвореници меѓу Русија и САД.

Сепак, имаше зголемени индикации за голема размена на затвореници меѓу Русија и Белорусија, од една страна, и САД, Германија, Словенија и Велика Британија од друга страна.

„Продолжувам да не коментирам“, изјави претходно портпаролот на Кремљ Дмитриј Песков на редовниот брифинг со новинарите, а ниту Белата куќа не даде коментар.

Фокс њуз пред неколку часа објави дека затворениот репортер на Волстрит журнал треба да се врати во САД како дел од размена на затвореници, веројатно подоцна денес.

Всушност, веб-страницата Flightradar24, која ја следи патеката на авионите, покажа дека специјален руски владин авион што се користел за претходна размена на затвореници меѓу САД и Русија летал од Москва до руската енклава Калининград, која граничи со Литванија и Полска, пред да се врати во руската престолнина.

Пол Вилан, поранешен американски маринец и Владимир Кара Мурза, руско-британски дисидент – и двајцата затворени во Русија – се исчезнати, изјавија нивните адвокати вчера, откако најмалку седум руски дисиденти беа ненадејно преместени од нивните затвори во последните денови.

Денеска во рускиот печат имаше непотврдени информации дека уште еден дисидент и опозициски активист, Вадим Останин, е префрлен во Москва од неговиот затвор во Сибир.

Во меѓувреме, адвокатот на Александар Виник, Русин приведен во САД, вчера во изјава за државната новинска агенција РИА, одби да потврди каде се наоѓа неговиот клиент „додека не се случи размената“. Сепак, адвокатот Аркадиј Бук изјави за РИА дека адвокатите кои ги застапуваат затворениците во Русија му кажале дека се „на пат“ кон непознати локации.

РИА, исто така, објави дека четворица Руси кои се наоѓаат во американските затвори исчезнале од базата на податоци на затвореници управувана од американската Федерална затворска служба.