Пред само недела-две се чинеше дека Роналд Араухо кариерата ќе ја продолжи во Јувентус, кој веќе ги координираше последните детали од трансферот со Барселона.

Можноста уругвајскиот фудбалер да си замине предизвика големо незадоволство кај навивачите на Барселона. Сепак, по одличниот настап во Ел Класико и Суперкупот, клубот целосно го смени ставот и успеа да го убеди Араухо да потпише нов договор, што денеска и официјално беше потврдено.

Араухо го продолжи договорот до 2031 година, а шпанските медиуми пренесуваат дека сличен потег во наредните денови би можел да направи и играчот за врска Педри, кој исто така е меѓу играчите со кои клубот има долгорочни планови.

Араухо пристигна во Барса во 2018 година од уругвајскиот клуб Бостон Ривер, а една година подоцна дебитираше за првиот тим во кој досега има 154 настапи.

Оваа сезона, Уругваецот ја извршува функцијата втор капитен на тимот, зад моментно повредениот германски голман Марк-Андре тер Штеген.