Романија е на четвртото место на ранг-листата на европски земји со најевтини станови, по Турција, Босна и Херцеговина и Албанија, со просечна цена од 1.676 евра/кв.м. во 2024 година, што е за 11,5% повеќе во споредба со 1.504 евра/кв.м. во 2023 година, објави романската агенција Aжерпрес за БTA, повикувајќи се на специјализирана студија на Дилоит, објавена вчера.

Најскапите куќи се во Луксембург со просечна цена од 8.760 евра/кв.м. во 2024 година. Студијата „Делоит Проперти Индекс 2025“ анализира податоци од поголемите градови во 28 земји (од кои 21 се во Европската Унија). Генерално, 18 од 28-те земји пријавиле зголемување на просечните цени на куќите, со најзначајни зголемувања во Полска (+19,3%) и Албанија (+16,5%), додека забележителни намалувања се пријавени во Турција (-12%), Луксембург (-3,4%) и Холандија (-2,3%). Цени под 2.000 евра/кв.м. се наоѓаат само во Грција (1.792 евра/кв.м.) и Романија, без достапни национални податоци за просечните цени за Бугарија и Ирска.

„Цените на станбените недвижности во Европа продолжуваат да одразуваат сложена интеракција помеѓу ограничената понуда на нови станови, имено зголемените трошоци за изградба, построгите услови за финансирање и посложените регулативи, и загриженоста за економските перспективи и развојот на животниот стандард во анализираните земји. Романија е меѓу земјите каде што цените се зголемија во 2024 година во услови на голема побарувачка и недостиг на нови станови, а трендот се очекува да продолжи, барем на краток рок, со оглед на зголемувањето на ДДВ на 21% за нови станови (вклучувајќи ги и оние што имаат корист од намалена стапка) и неизвесноста околу правилата за урбанистичко планирање, главно во Букурешт. Од друга страна, продолжувањето на инфлацијата ги одржува трошоците за финансирање високи, правејќи ги хипотекарните кредити, кои во голема мера го поддржуваа пазарот во 2024 година, помалку прифатливи“, рече експертката Ирина Димитриу.