По измените на Кривичниот законик (КЗ), со кој се намалени казните за злоупотреба на службената должност и за злосторничко здружување, Обвинителството има кратки рокови да издејствува пресуди во високопрофилните случаи онаму каде што нема застареност, нагласи обвинителката Ленче Ристоска во врска со законските измени со кои потешко ќе се доаѓа до правосилност на пресудите поради застарување на делата. Измените на КЗ многу влијаат врз културата на неказнивост која се протежира во минатите години, додаде Ристоска, поранешна обвинителка во Специјалното јавно обвинителство (СЈО), а сега во ОЈО Скопје.

– Обвинителството е ставено пред навистина неблагодарна и тешка задача. Имаме кратки рокови онаму каде што нема застареност тоа експресно да се заврши. Од друга страна, ресурсите се такви какви што се и не се унапредени состојбите. Голем дел од предметите во кои досега сме вложиле многу ресурси и енергија веќе ни застаруваат, барем оние во кои јас постапувам. Во тек е анализа во Обвинителството да видиме точно која ќе биде импликацијата од измените на КЗ. Но, самите измени како такви, јас лично ги доживувам како навреда за сите професионалци што сме се вложиле во борбата, пред сè, против корупцијата, затоа што овие измени најчесто ќе ги афектираат коруптивните кривични дела – рече Ристоска.

Прашана дали има некаква излезна варијанта за случаите во кои им се суди на високи функционери, како, на пример, преквалификација на делата, продлабочена истрага и слично, Ристоска одговори дека Обвинителството ќе преземе сè што може за да се извлече максимумот.

– За истрагите што се во тек и предметите што не се на судење, се разбира дека истрагите ќе опфатат и дополнителни сегменти. На оние што се на судење, ќе мора да се извршат преквалификации за да се извлече максимум од ситуацијата. Исто така, да не заборавиме дека кои било измени со кои некој се спасува од кривична одговорност, не ја изземаат од одговорност имотната корист, конфискацијата останува на сила, па ќе се бориме да се спроведе – рече Ристоска.

Таа додаде дека конфискацијата во моментов е полужива и дека има проблеми во тој сегмент, ама ЈО мора да направи сè што е можно за да го обезбеди имотот, а онаму каде што има проблеми во конфискацијата потребна е подобра политичка соработка или измени на законот.

И додека се чека ЈО да донесе општ обвинителски став за тоа како да се постапува понатаму во предметите што се опфатени со најновите измени на КЗ, оваа недела во судница се најдоа три предмети на поранешното СЈО во кое им се суди на поранешни функционери – денеска беше „Траекторија“, а претходно и „Титаник“ и „Таргет-Тврдина“. За предметот „Траекторија“, кој се наоѓа во доказна постапка, судењето продолжи. Обвинети се поранешниот премиер Никола Груевски, кому му се суди во отсуство, ексминистерот за транспорт и врски Миле Јанакиески, поранешниот вицепремиер Владимир Пешевски и поранешниот директор на ЈП Државни патишта, Љупчо Георгиевски за тендерот за изградба на автопатиштата Миладиновци-Штип и Кичево-Охрид. Застапник на ова обвинение е обвинителката Лиле Стефанова, која во случајот „Титаник“ пред неколку денови, за време на судењето не ги спомна законските измени, а во разговор со новинари објасни дека за тоа ќе се произнесе во завршниот збор. Според неа, тогаш ќе се повлече обвинението за злосторничко здружување, а судот застареноста ќе ја констатира во пресудата. Адвокатите, пак, објаснија дека судот не може на нивен предлог или по службена должност да констатира застареност на некое кривично дело среде судење, туку само по иницијатива на обвинителството. Во предметот „Титаник“ се обвинети Никола Груевски, Кирил Божиновски, Миле Јанакиески, Гордана Јанкулоска, Билјана Бришкоска Бошковски, како и Илија Димовски, Мунир Пепиќ, Едмонд Темелко, Леко Ристовски, Кирил Тодоровски и други за злосторничко здружување, повреда на избирачкото право и други.
Судењето за предметот „Таргет-Тврдина“, пак, на барање на Јавното обвинителство беше одложено на барање на ЈО сè додека не се донесе соодветна јавнообвинителска одлука. На рочиштето, судијата Илија Трпков информирал дека до судот пристигнал поднесок од ЈО во врска со измените на КЗ, кои влијаеле врз правната квалификација на кривичните дела и на обвинителниот акт, по што судењето го презакажа за 4 октомври. Предметот „Таргет-Трвдина“ е еден од клучните предмети на СЈО и се однесува на масовното незаконско прислушување. Апелација го врати на повторно судење, а во првичната пресуда за нелегалното масовно прислушување обвинетите добија затворска казна вкупно од 55 години од кои 12 години за поранешниот шеф на УБК, Сашо Мијалков, а по 15 години добија Горан Грујевски и Никола Бошковски, шест години Тони Јакимовски, четири Гордана Јанкуловска и три години затвор Надица Николиќ.